CARIYOS KETHEK OGLENG
Tari Kethek Ogleng punika
satunggaling tari ingkang nirokaken tingkahipun kethek.Ing laladan Kabupaten
Wonogiri, tari punika sampun kondhang.Malah sampun kadhaku minangka tari
asaling saking Wonogiri. Dene cariyosing tari punika kapendhet saking
lelampahanipun Dewi Sekartaji kalihan Raden Panji Asmarabangun putra raja
Kedhiri ingkang sami prasetya angrakit katresnan sarta gesang brebrayan
sesarengan ngantos dumugining seda.
Kekajenganipun ingkang putra benten
kalihan kersaning sang prabu Jenggala. Sang prabu kagungan kersa bilih Dewi
Sekartaji badhe kadhaupaken kalihan priya pilihanipun sang prabu piyambak.
Ananging sang dewi boten kersa anglampahi kados ingkang dipun kersakaken
ingkang rama, pramila ing satunggaling dinten sang dewi lajeng jengkar saking
praja. Tindakipun Dewi Sekartaji mangilen namung kadherekaken abdi kinasih.
Kendhangipun sang dewi saking kadhaton ing dalu punika boten ingkang priksa.
Ejingipun kaputren geger jalaran
sang dewi boten wonten ing kaputren. Kaputren geger, kadhaton geger, negari ugi
geger.
Pawartos kendhagipun Dewi
Sekartaji kapireng Raden Panji Asmarabangun.Pramila Raden Panji Asmarabangun
nedya ngupadi kekasihipun punika.Saderengipun tindak, Raden Panji Asmarabangun
pinarak ing dalemipun satunggaling padhita kanthi sedya nyuwun pitedah babagan
icalipun Dewi Sekartaji. Dening sang pandhita, Raden Panji Asmarabangun dipun
paringi pitedah supados tindak mangilen. Sang paji kaprayogekaken supados
anamur laku minangka kethek.
Sang dewi jebul ugi anamur laku
minangka lare dhusun ingkang peparab Endhang Rara Tompe.Lampahipun Endhang Rara
Tompe munggah gunung mudhun jurang paribasanipun ngantos dumugi ing
satunggaling dhusun.Inggih punikna dhusun Manahati.Ing dhusun mriku Endhang Rara
Tompe lajeng dhedhepok.Sasaged-sagedipun, kanthi kabiyantu dening abdi
kinasihipun dalah warga dhusun, Endhang Rara Tompe ngedegaken gubug.
Ing wana sacerakipun pondhok
mriku wonten satunggaling kethek. Suwaunipun Endhang Rara Tompe ajrih kalihan
si kethek ingkang agengipun meh sami kalihan manungsa tur saged tata jalma.
Nanging danguning dangu, gadheng si kethek pranyata boten galak, malah kepara
njalma, kekalihipun malah lajeng kekancan raket.Sianosa makaten, Dewi Sekartaji
boten priksa sinten sejatosipun si kethek.Semanten ugi Raden Panji Asmarabangun
boten priksa bilih sajatosipun Endhang Rara Tompe punika kekasih ingkang
sadangunipun punika kaupadi.
Anggenipun kekancan saya raket,
saya raket.Lajeng ing antawisipun Endhang Rara Tompe kalihan si kethek
anglairaken uneg-uneging manahipun piyambak-piyambak.Wekdal punika ugi Endhang
Rara Tompe lajeng badhar dados Dewi Sekartaji, sedheng si kethek badhar dados
Raden Panji Asmarabangun. Pepanggihan punika andadosaken kekalihipun kebegan
seneng lan trenyuh. Raosing manah kekalihipun kadidene kejugrugan seganten
madu.
Komentar
Posting Komentar